" أبو غرائب تونس"

" ابو غريب العراق وابو غرائب تونس " هو عنوان المقال الذي  نشره محمد عبو في اوت 2004 على موقع "تونس نيوز" واتخذ ذريعة  لمحاكمته . و بمجرد توقيفه في بداية مارس 2005 تحرك المحامون  و الكثير من الناشطين السياسين و النقابيين لمساندته... 
ولأني اعتقد ان ملابسات القضية معروفة لن اتوقف عندها بل سأنطلق مما جاء في المقال المذكور. يقول عبو في بداية هذا المقال: "صدم الكثير ممن علموا بما حصل بسجن أبو غريب لإخواننا العراقيين على أيدي قوات الإحتلال من تعذيب وانتهاك للكرامة واعتداءات جنسية وعبّر الكثيرون عن تأثرهم الشديد بما شاهدوه.
لكن تعتري المتابع للشأن العام حيرة ويجد نفسه مدعوا لوضع بعض نقاط الإستفهام حول ردّ الفعل الغاضب هذا، خاصة إذا ما علمنا بأن ما روى عن انتهاكات سجن أبو غريب لا يجعلها تتجاوز فظاعة ما يحصل بسجون تونس ومقرات الفرق والمراكز الأمنية ومقر وزارة الداخلية دون أن يلاقي الأمر اهتمام مماثل. فهل أن للمسألة علاقة بقنديل باب منارة الذي لا " يضوي كان على البَرّاني "؟ أم هو مرض من أمراض العين يتمثل في القدرة على الرؤية عن بعد وضعف النظر عن قرب بحيث لا ننظر لإخواننا إلاّ عن مسافة لا تقل عن 2400 كلم ؟"            
  ولأن الواقع في مقرات الفرق والمراكز الامنية و ربما في مقر وزارة الداخلية لم يتغير فاننا نعيد توجيه السؤال. و بالذات للسيد الوزير السابق المكلف بالاصلاح الاداري المستقيل من حكومة اصبح بعد استقالته امينا عاما لحزب هو ضلعها الثاني.. و هذه  احدى غرائب تونس بعد الثورة... 
اذن، نوجه الى السيد عبو نفس السؤال مع التذكير  ببعض الامثلة  و هي حتما مجرد  أمثلة لا تستقصي كل الحقيقة:
ـ تعرض  المحتجين في معتمدية الحنشة الى القمع الشديد وتعرض الموقوفين منهم الى  شتى أنواع التعذيب  
ـ وفاة مواطن تونسي تحت التعذيب 
اغتصاب مواطنة تونسية من قبل اعوان الامن
هذه بعض غرائب تونس بعد الثورة... فماهو موقف السيد الوزير السابق امين عام حزب المؤتمر من اجل الجمهورية  شريك النهضة في الحكم و في المسؤولية؟؟؟؟
  احقاقا للحق فانه لم يقف ساكنا امام هذه الانتهاكات الفظيعة. أيها السادة لقد اصدر المؤتمر ( وللتذكير فان ابرز مؤسسي هذا الحزب هو الحقوقي الدكتور المنصف المرزوقي الذي يشغل الان منصب رئيس الجمهورية المؤقت ) بيانا.
 تخيلوا؟؟ لقد اصدر بيانا للرأي العام.. وطبعا تعرفون مدى خطورة هذه الخطوة  التاريخية العظيمة الخارقة الشجاعة  التي تعبر عن الالتزام  والتضحية و الاخلاص والتي اقدم عليها الحزب في هذه المرحلة التاريخية الدقيقة..  فليس اصدار البيانات امرا هينا كما تعلمون.
نعود الى محتوى البيان:
 " سجلت الساحة الحقوقية في تونس مؤخرا عديد الانتهاكات الفظيعة لحقوق مواطنين تم الاعتداء عليهم بصور مختلفة في أنحاء متعددة من البلاد.
و إذ يستنكر حزب المؤتمر عودة هذه الممارسات التي لطالما التصقت بصورة البوليس في عهدي بورقيبة و بن علي، فإنه  يعتبر استمرارها، ان تأكد، دليلا على أن طريق المحاسبة و تنظيف الأجهزة الأمنية لازال طويلا على شرفاء وزارة الداخلية..."
 ان الحزب كما ترون " يستنكر" فهل بعد هذه الجرأة جرأة و هل بعد هذه المبدئية و الشجاعة و التضحية شجاعة او تضحية؟؟؟ ثم لاحظوا قيمة الجملة الاعتراضية في هذا البيان . هذه الجملة التي تشير الى الشك في حصول  ممارسة التعذيب و الانتهاك الصارخ لحقوق الانسان. يقول البيان :"إن وفاة مواطن جراء التعذيب و اغتصاب مواطنة أخرى و غيرها من الممارسات اللاإنسانية، إن تأكدت،  لتدعونا إلى إطلاق صيحة فزع يجب أن يبلغ دويها كل مقرات الأمن و مراكز الإيقاف و السجون."
كيف سيتأكد  المؤتمريون من حصول هذه الانتهاكات..  اذا لم تثبتها لهم تقارير الطب الشرعي و جثة المواطن المقتول ؟؟؟ ترى كيف يتأكد للمؤتمريين حصول التعذيب... موت تونسي تحت التعذيب ؟؟؟ هل علينا ان نذكرهم هم ايضا ان الجثث لا تكون الا في حالة وفاة؟؟؟؟ (وهذه ايضا من الغرائب)
غرائب تونس بعد الثورة لا تقتصر على التعذيب فحسب.. و لا داعي للتذكير بها لان القلب مل من عد النكبات والنكسات  والانتكاسات و الهموم والغرائب.. في ظل هذه الحكومة الشرعية التي ما فتئ السيد الوزير السابق امين عام حزب المؤتمر من اجل الجمهورية يذكرنا بان الخروج عنها بعد انتهائها يعرض الى عقوبة الاعدام..." بكل حزم" ( تصريح اليوم 13 سبتمبر 2012)




# شوف طبيب #


نظرا لفداحة الحالة الصحية النفسية لفئات عريضة من ابناء هذا الشعب وحاجتهم الاكيدة لاعادة تأهيل نفسي تحت اشراف اطباء مختصين نطلق اليوم الحملة الوطنية الاولى # شوف طبيب# الحملة ليست موجهة فقط لمن بدت عليهم اعراض #اكبس #
نرجو من اطباء الاختصاص و الجمعيات المختصة في الصحة النفسية وكافة المواطنين الانخراط في هذه الحملة على اوسع نطاق.

حتى لا نلدغ مرتين

لقد خدعنا في البداية... لدغنا الكلام الماكر
ثمة مكر في هذه الجملة الشهيرة التي خدعتنا  : "أسوأ ما في الديمقراطية انها تجبرك على سماع صوت الحمقى". انها تشوه الحقيقة. كان يفترض ان تكون كالتالي: " اسوأ ما في الديمقراطية انها تعرضك الى  صك البغال و الحمير ..." النهيق على كل حال لا يخلف كدمات.

لا يجب ان نخدع مرتين
 ثمة عبارة اخرى لا يجب ان نقع في مكرها الآن :" حين تغرق السفينة  تقفز منها الفئران اولا" علينا ان ننتبه الى امر بديهي: ان الفئران والجرذان خاصة لا توجد الا على ظهر السفن الوسخة القذرة... سفن القراصنة واللصوص. هذا سيفتح اعيننا على الحقيقة: ان السفينة تغرق فعلا، وحين تغرق السفينة تقفز منها الكلاب...  الكلاب ابناء الكلب قفزوا و يقفزون من السفينة تباعا  ويحاولون السباحة الى الشاطئ مجداد  اما الجرذان فمازالوا على ظهرها، عموما اتمنى ان يغرقوا معها. 
ما يؤرقني فعلا هو مصير البغال والحمير... 

الشرعية

كل واحد شرعيته في جيبه
= = = = = = = = = =
الشرعية شرعية و النية ما ثماش
= = = = = = = = = =
كل غريبة وغريبتها الا النهضة وشرعيتها
= = = = = = = = = = 
سارق و في ايديه شرعية
= = = = = = = = = =
عزوزة وشدت شرعية
= = = = = = = = = =
العزوزة هازها الواد وتقول عام السنة شرعية
= = = = = = = = = =
كسيدي كشرعيته
= = = = = = = = = =
جاء يعاون فيه على قبر امه هربله بالشرعية
= = = = = = = = = = 
الزغاريد اكثر من الشرعية
= = = = = = = = = =
اللي موش مستانس بالشرعية تتحرق حوايجه
= = = = = = = = = = 
لا يعجبك نوار شرعية في الواد عامل ظلايل....
= = = = = = = = = = 
كانت تشخر زادت شرعية
= = = = = = = = = = 
سعود ماهيش شرعية
= = = = = = = = = =
ركبوه على الشرعية مد ايده للزمبيل
= = = = = = = = = = 
هو يغني وشرعيته ترد عليه
= = = = = = = = = =
هرب من الشريعة جاء تحت الشرعية

النهضة و معاني السقوط (2)



كنت في تدوينة سابقة تحمل نفس العنوان قد  تناولت  معنى السقوط  في خطاب النهضة وممارساتها. واشرت حينها الى ان " السقوط النهضاوي" هو سقوط  بالمعنى المتداول في الفصحى وفي الدارجة التونسية. وهوموضوع اعود لتناوله لان الواقع قد قدم  في فترة وجيزة ادلة جديدة اكثر وضوحا على  استماتة النهضة في تنفيذ مشروعها الاستبدادي دون تعديل رغم مؤشرات الخراب العام التي لا يمكن ان ينكرها او يتجاهلها عاقل.

 تجلى سقوط النهضة  من البداية في  خطابها.  ذلك الخطاب الماكر الذي توجه الى ارضاء الجميع وخداع الجميع في آن (اتباع الحركة و  خصومها على حد سواء.) خطاب حاول ان يقنع الخصوم بتطور الحركة وقبولها بقواعد الديمقراطية  . وهو زعم  يتناقض جوهريا مع طبيعة هذه الحركة  فالنهضة شأن كل الحركات الاسلاموية   التي  تستخدم الدين استخداما نفعيا  لا تستمد شرعيتها من ارادة الناخبين   بل تدعي انها تستمدها من ارادة الله، لانها تحتكر تمثيله و تنفيذ ارادته على الارض.   ومعلوم ان الحركات الاسلاموية لا تكتفي بادعاء امتلاك الحقيقة المطلقة  (فهمها المنغلق للدين ) بل تدعي شمولية تلك الحقيقة ليمكنها الجمع بين شؤون الدين والدنيا. اذ تزعم ان الاسلام يتضمن حلولا لكل المشاكل و تحديدا و تنظيما لكل المسائل سواء اتصلت بالمجتمع ام بالفرد ، بالسياسي أو الاقتصادي أو التربوي ... بسياسة الدولة الخارجية أو بآداب الطعام...  و هو ما يشرع  لها  امتلاك الناس لا حكمهم فحسب.
ولئن حافظ خطاب النهضة بعد 23 اكتوبر على طبيعته و نبرته فقد كشفت ممارستها بعد هذا التاريخ عن عجز هذه الحركة عن التطور اولا وعجزها عن تحمل المسؤولية ثانيا   :
النهضة و حماية المقدسات
ـ تسعى النهضة الى استصدار قانون يحمي المقدسات   ليتيح لها  تضييق الخناق على الخصوم السياسيين باسم الدين والتخلص " بشكل قانوني" من كل صوت مخالف.  وبما ان المقدس في قراءة الحركات الاسلاموية لا حدود له ويتصل بكل مجالات الحياة فان قانونا من هذا النوع سيوسع هيمنة النهضة لتشمل كل المجالات. ومعلوم ان النهضة لا تعول على  القوانين التي قد تسنها  فحسب بل واساسا على جيش المريدين و الاتباع  (أعضاء، احزاب سياسية تابعة، جمعيات...) و الذين يتحركون في ارض الواقع لفرض هيمنة هذه الحركة وتوسيع سيطرتها
ان المقدسات لا تحتاج الى قانون يحميها و ان كان لابد من هذا القانون فالاجدر ان يتضمن التنصيص الصريح على تجريم كل من يستعمل الدين استعمالا نفعيا و يوظفه لخدمة مصالحه الحزبية لان الخطر الحقيقي يكمن في ظهور سلطة كهنوتية تتوسط بين الانسان و خالقه

النهضة و عودة الاعداء البدائيين( الكوليرا والطاعون)

ان الربط بين النهضة و ظهور الكوليرا و الطاعون  قد يبدو تحاملا على هذه الحركة  غير ان موقعها في السلطة باعتبارها الحزب الحاكم الذي يرزح الشعب تحت وطأة كفاءاته  الوزارية ( وكفاءة شركائها في الحكم) يفسر هذا الربط . 
 فظهور الكوليرا لم يكن بسبب ابتعاد الناس عن دينهم و مجاهرتهم بالكبائر، لم يكن بسبب حف اللحى وارتداء الملابس الفاضحة ، بل بسبب تراكم الاوساخ (علميا على الاقل) و لا اعتقد ان الحكومة تحتاج الى وقت لكي تتمكن من انجاز هذه المهمة.. ام ان رفع القمامة من الشوارع و الانهج يحتاج الى هدنة بستة اشهر؟؟؟ هل علي ان اقول ان الكوليرا تعني الصوملة...؟؟؟؟؟ فللأمراض ايضا دلالاتها. ثمة امراض البذخ و كالسمنة  و ثمة أمراض الفقر والجهل   كالكوليرا .
النهضة و استفحال الجهل
أما الجهل الذي استفحل  فهو جهل بمعنييه 
ـ الجهل بما هو نقيض للحلم و التسامح( ولا شك ان الامثلة على استفحال العنف و التعصب كثيرة فالاعتداءات المادية و المعنوية على المثقفين و الفنانين والجامعيين والصحفيين ... تكاد تكون يومية وسواء كان التنفيذ موكولا الى السلفيين او الى نهضويين غير منضبطين او الى ميليشيات فان المسؤولية تتحملها النهضة التي تغذي هذا الفكر و تدعمه بتغافلها عن محاسبة المسؤولين)
ـ والجهل بما هو نقيض المعرفة و عداء للتفكير (و لا شك ان رواج الرأي الذي يعتبر  الازمات التي تجتاح البلاد عقابا ينزله الله بعباده المارقين احد ابرز مظاهره )
....




نثر / شعر

السكر شعر. الصحو نثر.
الذهاب الى طبيب الاسنان وتمني الشفاء للجميع اثناء المغادرة نثر. الوقوع في حب الممرضة الجميلة شعر. نسيانها بمجرد مغادرة العيادة شعر.
انتظار دورك في مركز البريد لارسال حوالة نثر. الذهاب الى العمل نثر. ملابس النوم الفضفاضة شعر. البذلات الانيقة نثر. مرافقة ابنائك الى المدرسة نثر. لقاء صديق قديم صدفة عند بائع السمك شعر. هجوم الذكريات عليك شعر. السفر شعر. الوصول نثر. حوار قصير مع امرأة جميلة تلتقيها في قطارالليل  بينما يراقبكم الاخرون بحسد شعر. زيارة الاقارب في الاعياد نثر. الانتظار شعر. قراءة درويش والمتنبي... شعر. تدريس النحو والعروض نثر. الحب العابرشعر. الزواج نثر. مشاهدة نهاية فيلم مرتين شعر. البقاء وحيدا أحيانا شعر. الثورة شعر. وصول اللصوص الى الحكم نثر ركيك. هذا الخراب نثر.  الآن نثر...المستقبل شعر.
الحياة قصيدة نثر.





عن لبيب، طارق ذياب، والسيد تعيس الجمهورية مرة اخرى


لا ادري ان كانت الاحداث التي أتناولها بالتعليق قد حصلت تباعا ام انها متزامنة.. وفي كل الحالات ، ليس للترتيب تأثير كبير حتى و ان كان الزمن الفاصل بينها اياما. فجميع هذه الاحداث تعبر عن العمق السحيق الذي بلغناه ... لم يعد علينا الآن الا ان ننتظر صوت الارتطام المدوي بقاع الهاوية

اعلنت وزيرة البيئة " الاطاحة" بلبيب. و هذا الامريعد أحد أعظم انجازات الحكومة خلال الاشهر القليلة من حكمها. فلبيب هذا، لمن لا يعرفه، هو ابرز رموز الفساد في حقبة بن علي.. ولا داعي للتذكير بانه سبب ارتفاع معدلات البطالة وسبب الفقر و التهميش و التفاوت بين الجهات فليس هذا ما يعنينا الآن.. بل لماذا تمت الاطاحة به الان.. لماذا جاء هذا القرار بعد اشهر من تشكيل الحكومة؟؟ لقد اكتشفت حكومتنا الرشيدة الراشدة ان لبيب.. لبيب ابن الكلب هذا.. هو من كان وراء المؤامرة التي دبرت للاطاحة بها في شهر مارس.. عرفت الحكومة ذلك باكرا و لكنها خيرت الرصانة و الهدوء حفاظا على امن الشعب واستقرار البلاد فأمرت العشب و الاشجار في كل الميادين و الساحات التي يقف فيها لبيب فاتحا ذراعيه أمرتها بمراقبة هذا المتآمر .. وبعد جمع كل التقارير و تحليلها ثبتت الادانة.

في نفس السياق جاءت تصريحات وزير الرياضة في باب سويقة أمام " جمهور النهضة" ( أيها الكلام كم انت ماكر.)
قلت، أعلن الوزير ان الحكومة باقية في الحكم الى سنوات قادمة،الى 2019 ان كنت قد سمعت بشكل جيد) رغم كيد الكائدين الذين توقعوا سقوطها في مارس.. ثم قال ما قال عن المعارضة.. قال ما سمعه ولاشك من اخوانه.. قال ما سمعه من قادته في الحزب...
قبل ذلك بقليل او بعده بقليل ربما كان السيد تعيس الجمهورية في سجن الناظور بمدينة بنزرت يحرر عصفورا من القفص. (ترى من اقترح عليه هذا الامر العظيم ام انه هو من خطرت له تلك الفكرة الفذة؟ كيف لمعت في ذهنه؟؟؟)
بقطع النظر عن الخراب الذي نحن فيه. فانه لا بد من التنبيه على فجاجة الرسالة ( حرية = تحرير عصفور من القفص) ونمطيتها و ركاكتها . وهي ركاكة ذوقية و بلادة ذهنية لها تجليات اخرى عديدة...

أطيح بلبيب اذن، و تكلم طارق ذياب كما يحلو له و حررالسيد تعيس الجمهورية العصفور من قفصه و في هذه الاثناء (أو قبل ذلك بقليل او بعده ) يعاقب التونسيون في كل انحاء الوطن لأنهم تجرؤوا على الحلم.
للعقاب الوان كثيرة: هراوات الامن والغاز المسيل للدموع، السحل في الشوارع على ايدي المليشيات ، اقتحام المنازل، ارتفاع الاسعار ، التكفير، التفقير، البطالة الابدية، كفاءة بعض وزراء النهضة، خطابات السيد تعيس الجمهورية... والغموض الذي يلف الايام القادمة...
لم يعد علينا الآن الا ان ننتظر صوت الارتطام المدوي بقاع الهاوية.. أما اذا كان حلمنا قويا بما يكفي فستنبت لنا أجنحة قبل الارتطام بلحظة..ستنبت لنا اجنحة و سنعلوا و ننجوا. لحظة واحدة تكفي لتجمعنا مرة اخرى...

السيد تعيس الجمهورية

يااااااااااااااا... ما أتعسنا بك ! ! ! ما أتعسنا ما أتعسنا !!
اعرف انك تبذل قصارى جهدك لتتكلم مثلما يتكلم الناس.. ولعلك اعييت بعض من حولك من المخلصين لك، لا من يتملقونك ولكنك قتلتنا يا رجل.. خربتنا يا اخي..
يا أخي.. ارفق بنا!

لم ينفعك البرنس اذن؟ ولن تنفعك " الشرعية" بالامس سمعتك تتحدث عن شرعيتك التي لا يمكن أن يعترض عليها احد.. شرعيتك التي يعتبر الاعتراض عليها اعتراضا على ارادة الشعب...
هل تعتقد فعلا ان شرعيتك ستمنع الشارع من ازاحتك لو اقتضى الامر؟؟؟ من علمك هذه " الفتوى" ؟؟؟ و انت المحاط بأشد الفقهاء بؤسا
ماذا لو قادتنا " شرعيتك الى الهاوية؟؟ هل سننتظر حتى نبلغ القاع و تكسر رقابنا؟؟؟ ثم عن اي شعب تتحدث؟؟ هل انتخبك الشعب؟؟؟
ما أخوفني من أن يكون الله قد قصد ان يعذبنا بك .

مع الاسلامويين -3

مع الاسلامويين 3


كنت قبل أربعة سنين حكيت على "الاسلامويين" ضحايا النايلسات.. ضحايا " الرحمة" و" اقرأ" و" الناس" و غيرها من البازارات اللي تبيع في سلعة الصين المضروبة ... و سلعة المشعوذين و الدجالين... و في نفس الوقت تبيع في التوبة النصوح وهكتارات في الجنة للي يشري.. (هنا )
و وقتها حكيت على الظاهرة من خلال نماذج اجتماعية حقيقية صادفتها و الا كنت نتعامل معاها.. و في نفس الفترة حكيت على نوع اخر من الاسلامويين اللي كانت الجزيرة و غيرها من المنابر مفتوحة امامهم باش يسوقوا كذبتهم الكبيرة.. كذبة القبول بالاخر.. بلعبة الديمقراطية .. كذبة تطور اطروحاتهم .. و رفضهم للعنف.. الاسلامويين المندسين في لبوس حداثي.. اصحاب الخطابات المزدوجة.بل والمتعددة...(هنا)
و في التدوينة هذي باش نكمل نحكي على الاسلامويين... الاسلامويين اللي في السلطة.. لكن قبل هذا ما ذا بي نذكر بحاجات من باب وذكر لعل الذكرى..

1ــ في سياق سعيها المحموم للسلطة كانت النهضة قد مارست العنف، و مانيش نحكي على ماء الفرق و الحرق والتفجيرات فقط بل نحكي على محاولتي الانقلاب في 1987 و في 1991 (و اذا الثانية مشكوك فيها فان الاولى ثابتة باعترافهم)
2ـ بعد وصول بن علي للحكم النهضة شاركت في الانتخابات و كانت باش ترضى باللي كتب من بن علي ( اللي سموه حامي الحمى والدين و لمزيد الدقة كان هذا نهار 17 جويلية 1988 يا سيدنا الشيخ كان تتفكر) لكن بن علي هو طلع ما يقسمش مع حتى حد و طبعا كان الرد محاولة تصفية النهضة
و هذا يعني اللي النهضويين اللي تسجنوا و تمت ملاحقتهم و تعذبوا.. ما تعذبوش من اجل الشعب الكريم كيف ما يحبوا يظهروا و انما من اجل السلطة... و هذا ما ثبت بعد توليهم السلطة
3- بعد تعرض الالف النهضويين ( كيف ما قالوا) للتعذيب والسجن و القمع قيادات النهضة اللي كانت في الخارج كانت تلوج على اي باب يرجعهم لحضن بن علي...كانوا يغازلوا في صهره الفاسد سيء الذكر صخر الماطري و يبعثوله في برقيات التهنئة و ربما تصوروا انه الخليفة الوحيد لبن علي لذلك بدوا يطحنوله على بكري.. طبعا ما خفي ربما يكون اعظم و لكن الثابت كيف برقية التهنئة اللي بعثها راشد الغنوشي لصخر الماطري وقت اللي حل اذاعة الزيتونة يفتح الشهية لتأويلات عديدة... زعمة كان ثمة تونسي ما يعرفش اللي صخر الماطري فاسد؟؟؟؟؟
و باختصار واضح و جلي اللي قيادات النهضة كانت مكلوبة على السلطة.. تقسمها مع بن علي او تقسمها مع صخر موش مشكل.. توصللها بالانتخابات و الجري في ركاب بن علي و الا توصللها بالانقلابات و الكرطوش و الدم موش مشكل .. المهم انها توصل للسلطة

بعد انتفاضة 17 ديسمبر/14 جانفي النهضة كانت محضرة روحها على الاخر.. كانت فرصة و ماهيش مستعدة تخسرها
و بقطع النظر على لعبانها على عواطف الناس واستغلال فقرهم و عدم اطلاعهم.. بقطع النظر على تسول العواطف والتحالف مع الانتهازيين بجميع اطيافهم كان جلي انها قدمت الضمانات الكافية للامريكان و الاوروبيين و السعوديين و القطريين ... يعني قدمت الضمانات الكافية للامبريالة و للرجعية في نفس الوقت.. و لا شك ان الحضن اللي خذا به الجبالي زعيم الصهيونية في امريكا سيء الذكر ماك كاين واحد من الصور المعبرة على حجم الضمانات المقدمة... و من غير ما نحكوا على مقترح دسترة تجريم اسرائيل اللي ترفضه النهضة رفضا قاطعا.


توة نشوفوا اش ينجموا يعملوا الاسلامويين بالسلطة؟
و الاجابة ما تقتضيش لا اجتهاد و لا تكسير راس.. كل يوم جديد تحت حكم النهضة و حلفائها يقدمنا هو اجابة بحد ذاته و لكن انا باش نحكي على بعض النقاط فحسب
-1 تم تعيين رفيق عبد السلام بوشلاكة وزير خارجية و طبعا تم تعينه بصفته صهر راشد الغنوشي زعيم حركة النهضة.. بعض التوانسة تململوا على خاطر ما عادش عندهم استعداد لتكرار تجربة بن علي و اصهاره اللي مازالت اثارها فاعلة في تفاصيل حياتهم اليومية... و طبعا النهضة قدمت تبريرها.. اختيار رفيق عبد السلام بالذات كان لكفائته و ليس لاعتبارات اخرى ... ومن بعد تبين اللي كفاءة رفيق عبد السلام تتجلى في جهله بطول السواحل التونسية..

وموش اكهو.. ثمة ما اعظم من الجهل بالجغرافبا... وزير خارجية يتحدث في منبر خارجي على " احزاب الصفر فاصل"؟؟؟ هذي الديبلوماسية التونسية في عهد النهضة.
2-عجز النهضة التام على العثور على حلول حقيقة لمشاكل التوانسة ( و هذا امر ينجم يتفهم بالنظر للكفاءة اللي تزخر بها النهضة كيف السيد رفيق عبد السلام مثلا ) و هنا نفرق بين حل المشاكل اللي ينجم يستغرق سنين والعثور على الحلول المناسبة اللي المفروض يكون موجود قبل تسلم السلطة. المهم ها العجز المقرون بخوف مرضي هستيري عند قيادات النهضة من فقدان السلطة او خسارة جزء منها في حال تصير انتخابات مثلا، خلى النهضويين و خاصة القيادات يتخبطوا بشكل اخرق.. و هنا ظهر الحديث على المؤامرة اللي قاعدة تتحاك ضدهم بهدف تعطيلهم و اللي ما ظهرلهمش بعد انها مؤامرة... و في نفس الوقت يبدوا انهم قاعدين يوجهوا في اهتمام الناس لمسائل لا علاقة لها بالمشاكل الحقيقية... نقول يبدوا على خاطر ما ثماش حتى دليل واضح باستثناء المنطق السليم، يعني، بالمنطق، اشكون المستفيد من تحويل اهتمام التوانسة على مشاكلهم الحقيقة؟؟؟
بالمنطق، هل يعقل مثلا ان يتزامن تدنيس القرآن في بنقردان و تدنيس مسجد في العاصمة؟؟؟ و من المستفيد ؟؟؟
3 ـ هات نشوفوا المواضيع اللي قاعدين يناقشوا فيها التونسة في الشارع ( تحت حكم النهضة)
النقاب، الحجاب، اللحية، مجلة الاحوال الشخصية، الشريعة... و اليوم في عيد الاستقلال بعد بعد اكثر من نصف قرن على الاستقلال التوانسة اضطروا انهم يهبطوا للشارع باش يدافعوا على حقهم في دولة مدنية... موش كأننا رجعنا خمسين عام لتالي؟؟؟؟
النقطة هذي نحب نختمها بكلمة لصادق جلال العظم: يقول " انني على قناعة من ان من خصائص الازمة العامة المستحكمة في الحياة العربية الراهنة و أغراضها صعود و انتشار و هيمنة تيارات فكرية ارتدادية لا عقلانية تتناول فكريا و فلسفيا جميع المسائل من مواقع العداء للعقل و للتقدم و للعلم "

وللتبسيط أضيف: الاسلامويين راهوا ما ينجموش يؤمنوا بالتقدم ... التقدم يتعارض جوهريا مع فهمهم للتاريخ... راهو بالنسبة ليهم بقدر ابتعادهم على لحظة النبوة بقدر الغرق في الانحطاط... راهي لحظة النبوة بالنسبة ليهم هي المركز و هي قمة التطور هذكا علاش يحبو يرجعولها... راهي حكاية تصور للتاريخ ماهيش حكاية شهوة... بالنسبة ليهم التاريخ خط متواصل. النقطة المضيئة هي لحظة النبوة كيف ما قلنا و بعدها يبدأ الانحطاط ، يعني التقدم ماهوش القدام و انما لتالي... و السلطة اذا يمتلكوها فانهم بالضرورة باش يستعملوها في تطبيق نموذجه اللي كماله يكون بقدر تطابقه مع لحظة النبوة.. يعني اذا تلقى اخوانجي يحكي على الديمقراطية افهم اللي هو يا اما موش فاهم و الا يحشي فيه و الاحتمال الثاني اقرب.

تكبير


تكبير.. تكبير .. تكبيييير...

و خطب طراطير..

ومجلس ريق و بوس وبص و نوم و تشخير

تكبير.. تكبيير .. تكبيير

و اشارات... اشارات... و وحي و خلافة و تكفير

تكبير...

و حلقات ذكر وجاوي و تار و بندير..

و طريق خراب و هدم و تجهيل و تفقير..

تكبير... تكبير... تكبير




النهضة ومعاني السقوط


النهضة مرادفة للسقوط بالمعنيين الفصيح و العامي (في اللهجة التونسية )
بالمعنى الفصيح . السقوط يعني الانهيار و هو في الحقيقة الضد متع كلمة النهضة موش المرادف ليها. اما اذا نحكو على النهضة / الحزب.. فان السقوط ربما لا يكفي لوصف المستوى اللي تبشر به النهضة من خلال الاشهر اللي تعدو في حكمها... بخلاف ان حمادي الجبالي قاعد يبتسم للشعب ... تم التنكر لكل الوعود الانتخابية اللي وعدوا بها انصارهم و نكثوا كل الوعود اللي التزموا بها قدام الشعب
يعني لا شغل و لا حرية و لا كرامة
الشغل قالك يبطى شوية ... هام يستنوا في اشارة ربانية و اذا يعتصم واحد يقصولوا اطرافوا.. و كملوا جابوا الطهار يخوفوا به في الناس... اللي يفكر في الخدمة و الا يطالب بها يجيبولوا الطهار...
الحرية.. كل يوم يحاولوا يخنقوها اكثر.. على فيلم والا تصويرة شنعوا الدنيا و اللي يتحرك يشد الحبس... ... موش متاعنا. الفن موش من عاداتنا وتقاليدنا .. و المشكل واضح : ناس تعادي الفن و بنفس القدر تعادي الجسد.. و مستعدين في اي لحظة لمحاصرته و ترويضه... بالنسبة ليهم اي حاجة اي حركة اي تلفيتة اي كلمة في نهاية تحليلهم ماهي الا نيك.. حتى ضوء الستوب يشوفوه حلمة متع بزول و اي حاجة مكورة بالنسبة ليهم بزول... تفاحة .. برتقالة... امبولة متع ضوء (بزول يضوي)... اي حاجة مكعبرة بزول و اي حاجة مدورة ترمة و اي حاجة مثلث...

الكرامة... حدث و لا حرج.. قالك ما يحبوش يحرجوا السعودية... و ماهمش ناوين يحاسبوا حتى حد... و مستعدين ياخذوا ماك كاين الصهيوني بالحضن... المهم يكملوا يحكموا و يدبروا شوية فلوس على حساب كرامة شعب كامل... و لا عمرهم يعنيهم الشعب... اللي يعنيهم هو النجاح مهما كان الثمن في اقناع الخارج (ثم الداخل كان لقوا وقت للداخل) اللي هم الاصلح لخدمة المصالح الامريكية و الصهيونية ويمكن ياسر ينتصروا على معلمهم القطري الفذ و يترشحوا لمنافسات العمالة اللي مترشحتلها قطر و السعودية بعد ما خرجت مصر من التصفيات بعد الانتفاضة المصرية والاطاحة بمبارك... و لو كان تلعب تونس بالنهضة و المؤتمر و التكتل و يكملوا يهبطوا العريضة في الشوط الثاني يمكن توصل للنهائي و ديجا حكاية اصدقاء سوريا حاجة لوكس متع عمالة و صهينة
اش صورنا من ها النهضة.. لا شغل لا حرية لا كرامة

اما بالمعنى العامي فان السقوط يعني ان الواحد يكون بو وجهين و يمكن اكثر... و احسن انجاز عملته النهضة في ها المجال هو انها تطيش الزبلة على مقرات الاتحاد في الليل و تمشي الصباح تلم... انها تأكد انها باش تدعم مكاسب المرأة .. و تحاول تفرض الشريعة مصدر " وحيد للدستور" و هذا موش مجرد سقوط و انما سقوط نهضاوي بامتياز


المغرب تعتذر لقرائها


وضحت المغرب ملابسات نشر الصورة المعدلة على صفحتها الاولى و اعتذرت لقرائها
و أعتقد ان هذا الاعتذار هو ما كان ينتظره القراء. هذا التوضيح يغلق ملف الصورة تماما.


الان . لا يعنيني الخطأ بقدر ما تعنيني تبعاته.. و ما يمكن ان تكشفه تلك التبعات:
هو خطأ ( بقطع النظر عن الملابسات و النوايا) و من المنطقي ان يشير الناس الى هذا: " ثمة خطأ ما" و من المنطقي جدا ان توضح المغرب ملابسات الخطأ او ان تعتذر... و لكن لماذا اندفع البعض الى تهويل المسألة حتى لكأن نهاية الجنس البشري ستكون بسبب تعديل تلك الصورة؟؟؟؟؟ ثم لماذا اندفع البعض الى التهوين من شأن هذا الخطأ و مقارنته بأخطاء اخرى في مجالات اخرى.. كأن ذلك يشرع لهذا؟؟؟ دفاع محموم لا معنى له عن خطأ يتم تجاوزه بمجرد الاعتراف به.
هي أخلاق العبيد من الجانبين..

ضد الرداءة 5 ـ

الحقيقة لا تحتاج الى تزييف لتكون أقوى... الحقيقة كاملة بطبعها..
ما اقترفته المغرب مخز... لانه لم يقتصر على التزييف بل تعداه للاستهتار بذكاء القراء....

خانها ذراعها قالت يسار...

المشكل ان النهضة اختارت نفس السياسة الاقتصادية القديمة اللي خلت الناس يخرجوا للشارع..موش مشكلة وقت (و الحكومة مازالت كيف حطت ايديها و استنونا 6 شهر و توة تشوفوا العجب...) و لا مشكلة يسار ( الخاين العميل.. ايتام فرانسا. الكفار..)

اللي يطرشق المرارة في ها الوقت الكلب ان اغلب تعليقات النهضاويين و ما شاكلهم، حول موضوع استمرار الناس في الدفاع المشروع على حقوقهم اللي خرجتهم للشارع قبل 14 جانفي و من بعدها تجمع على اعتبار ها الحق الكلب في الحياة مؤامرة و خيانة و طحين ازرق... يا عامي... يا خويا .. تي حتى ام اربعة و اربعين كيف تحس بروحها مهددة تحاول تدافع على حقها في الحياة و تتمسك به قدر الامكان...ها الحق ما ينجم ينسينا فيه لا دين لا تروطيب متع سياسيين و لا والوا... . كل ما في الامر ان ناس تحب تبقى على قيد الحياة... نقلولهم لا.. انتم مأجورين من اليسار ومتورطين في مؤامرة على الوطن يا ايتام فرانسا .. ـ
. تي ثم ماو قلتوا اليسار 0.0000001 بالمائة.. كيفاش باش يدفع الناس للاعتصام و الاضرابات... تي ماهو ما عنداش حتى تأثير...و احنا عرب مسلمين و اش دخلهم بيناتنا ؟؟؟؟ هيا كيفاش دخلوا تره؟؟؟ تره يقلي واحد؟؟ زعمة مابين عشية و ضحاها ولوا يأثروا في الجماهير...؟؟؟؟
الناس اللي قاعدة تعتصم و تعمل في اضرابات... خدامة حقوقها مشت تنيك... وناس مهدديدين في خبزتهم...ـ و بالتالي من الطبيعي جدا و من المنطقي جدا انهم يدافعوا على حقهم.. و الا خلي يموتوا بالشر ميسالش؟؟؟ بل يعطيهم الصحة كيف لتوة يعملوا في الاضرابات اكهو... موش المفروض "نتعجبوا من اللي لا يجد قوت يومه و لا يخرج على الناس شاهرا سيفه"ـ؟؟؟ ( ابو ذر الغفاري)

الحاصل ، التشخيص نرمالمون واضح... : النهضة قررت تستمر في السياسة الاقتصادية القديمة... و اذا تغيروا المستفيدين فان المسحقوين هم هم .. المسحقوين هم المسحقوين... و اليوم عمال الحضائر و غدوة الاساتذة و المعلمين...
هذا من ناحية و من ناحية اخرى
اتهام الناس بالخيانة... نغمة قديمة .. نغمة ندرا وين كنا نسمعوها ...
يعني الكلشيات هذي الكل قديمة... و ما عندها حتى معنا و من البؤس استعمالها كما هي و من غير حتى محاولة تغيير الصياغة...

شبيكم وقفتوا؟؟


هات نتخيلوا الثورة ثنية... ثنية طويلة وواعرة.. حفر و حجر و شوك ... صعدة و هبطة...
ثنية تهز من حال لحال موش من مكان لمكان... و هات نتخيلوا الناس اللي ماشين على الثنية هذي...
اكيد انهم ما بدوش الرحلة في نفس الوقت.. ثمة شكون سبق و ثمة اشكون خلط خلوط.. ثمة شكون مشى خطوتين كأنه يشيع في جنازة و من بعد حبس... و ثمة شكون يمشي خطوة لقدام و خطوة لتالي ( مكانك سر)... اكيد ان ان الناس اللي ماشين على ها الثنية ما عندهمش نفس النفس.. نفس العزيمة و القوة... ثمة اللي يمشي خطوة و يوقف.. يخزر وراءه و يثبت اش ثمة القدام... و ثمة اللي يعفس و ديما على قدام حتى كان يطيح في هفهوف (الى الامام ... ثورة ثورة ثورة.. كيف ما قال القدافي).. ثمة اللي تمشي مع حبيبها و ثمة اللي يمشي وحده... ثمة اللي يغني ... اللي ...ساكت... اللي يمشي في قلب الثنية مع جماعته... ثمة اللي يمشي على الجنب

بعد عام.. الاكيد انه موش الناس الكل مازالت تمشي.. ثمة اللي وقف.. و اللي وقف ماذابيه لوكان الناس الكل توقف وين وقف هو... ماذابيه ماعاد يقدم حتى حد خطوة لقدام..يمكن وقف على خاطر لقى حجرة يقعد عليها وهو من الاول كان يلوج على حجرة يقعد عليها... و كيف لقاها ماعادش باش يحركه حتى شيء من هاك البقعة.. اكيد ثمة عباد تموت على القعاد على الحجر.. تعبد الحجر.. الاكيد انه اي واحد يوقف باش يحاول يوقف الاخرين... ينجم يقلهم مثلا : ثمة غول لو كان تكملوا تمشوا القدام ياكلكم... ينجم يتهمهم انهم باش يتسببوا في كارثة .. و انهم يحبوا يقتلوا العباد بالجوع و يهزوهم للهاوية... و اذا الحيل هذي الكل ما نفعتش.. الاكيد انه باش يقول اللي ربي بيده هو اللي قال اللي يلزمهم ياقفوا...(طبعا كل واحد منا ينجم يتخيل اللي قعد على الحجرة كيف ما يحب هو ينجم يتخيله لابس برنوس و الا عامل لحية.. مسألة خيال و كل واحد وجهده)
بعد عام الاكيد ان صارت برشة حاجات في الثنية.. تضحك .. تبكي... برشة حكايات و برشة عرك.. اللي عفسوله على الشلاكة اللي لابسها ..و رصتله يكمل حفيان و اللي واقف يبول تحت شجرة.. اللي ضايع فيها و اللي لاعبها بطل و خرج من الثنية جملة ... و اللي يحب الناس تمشي شادة الصف و اللي يحبهم يمشوا مقسمين النساء و الرجال... اللي يخطب علي الناس... و اللي يبعبص و يهرب... اللي يسرق و اللي ..يعطي في الكسكروتات و الماء... اللي ينزف و بكله جروح... ـ
ثنية طويلة... واعرة اما يلزمنا نكملوها

اللي يتصور اللي الثورة هي تغيير السلطة الاكيد انه وقف و ماعادش ينجم يكمل معنا حتى خطوة لقدام... و اللي يعرف مليح اللي الثورة هي تغيير مجتمع.. تغيير عقلية الاكيد انه مازالت الثنية قدامه طويلة... اكيد ثمة اشكون باش يتعب.. اكيد ثمة شكون باش يفد و ينهار.. و لكن الاكيد انه ثمة اشكون باش يكمل الثنية للاخر

*الصورة: انتفاضة الحوض المنجمي 2008