في معنى " الخريان فيه"

باش نحاول ننقل تفاصيل صارت اليوم في قاعة الاساتذة... و من بعد باش نعلق
الثامنة متع الصباح، عندنا ثلاثة زملاء اقترحوا الدخول في اضراب. بالطبيعة قعدنا باش نفهموا و نتفقوا على موقف... و اذا ما اتفقناش المهم نفهموا وجهات النظر
زوز من الزملاء هاذم و لا عمرهم اضربوا... عندنا 6 سنين نخدموا مع بعضنا و لا عمرهم اضربوا و لا كان عندهم استعداد حتى انهم يوقفوا معانا كيف يبدأ ثمة مشكلة باش ناقشوها في علاقة ظروف العمل و الا غيرها.. حتى الوقفة الاحتجاجية متع 20 دقيقة "المخجلة" (في خضم الاحداث ) ما التزموش بيها و الزميل الثالث كان معنا في العامين الاخرين ... يشارك في الاضربات كيف الناس الكل بقطع النظر على الاسباب اللي خلته يلتحق بينا (ومن الحب...)
المهم حاولنا نقنعوهم اللي النقابة العامة قررت الاضراب نهار الخميس و اللي من المستحسن ننضطوا و نلتزموا بالقرار خاصة في وضع حساس على الاقل باش نقطعوا الطريق على الهجمة المنهجية اللي موجهة ضد رجال التعليم بشكل خاص و الاتحاد عموما و اقترحنا ان الاضراب يكون بساعة احتجاج على الهجمة في انتظار ان غدوة يكون الاضراب تمهيد لمسيرات تنطلق من دار الاتحاد... بعد ما تعدينا للتصويت و عبرت الاغلبية على رغبة في الالتحاق بالعمل في التسعة رفضوا بتعلة ان التصويت كان على الرد على الهجمة ضد رجال التعليم في حين اللي مطلبهم هم متعلق باسقاط الحكومة و قالوا نزيدوا نستنوا توة يلتحقوا زملاء اخرين
علت الاصوات و بدوا يخطبوا علينا...
و قرروا انهم يستمروا في الاضراب بعد ما اتهمونا بالخيانة... خيانة الثورة
لحد هنا الامر مازال قابل للفهم... أما اللي موش مفهوم هو انهم بقوا للعشرة و من بعد روحوا لديارهم... طبعا لا كتبوا لائحة اضراب و لاهم يحزنون... يعني باختصار قطعوا من الخدمة
هذا واحد من الامثلة اللي ولت تصير كل يوم من 14 جانفي و انت جاي... واحد من المواقف اللي تنجم تبين بشكل واضح معنى الخريان فيه بما هو رؤية.. بما هو شكل من أشكال الاقامة على سطح الارض... الحياة على نحو " الخريان فيه"

نفترضوا جدلا اللي اللحظة لحظة مد و اللي اللي صاير امر عادي... في الحالة هذي يلزمنا نتقبلوا " الخريان فيه" كمنهج ينجم يفرض روحه... و هذا الخطير في المسألة، خاصة و ان اي اعتراض قد يعرضنا لتهمة الخيانة... خيانة الثورة و مبادئها
" و الخريان فيه" عنده تجليات متنوعة... اعلامية كيف جريدة الحدث و الصريح.. و التلفزة تونس7و حنبعل.. ونسمة و تجليات سياسية.. كيف ثابت و الاينوبلي و الغنوشي ( الغنوشيين الزوز) ...مثلا و القذافي و غيرهم و الاخطر هو تجلياته الثقافية... نقصد تكريس ثقافة الخريان فيه باعتبارها البديل الوحيد على الديكتاتورية
و تنجموا تعتبروا كلامي زادة خريان فيه راهوا ما يقلقنيش

افكار بصوت هادئ

استعير العنوان من سعدي يوسف لتقديم بعض الملاحظات الاولية
سأبدأ مما يفترض انه " أخطار" تحدق بما تم انجازه ( هذا الذي يبدوا فريدا جدا.. حين نحاول ان نتذكر ما تعلمناه عن ثورات الماضي... )
ان ما قد نتوجس منه خارجي و داخلي.
ـ الرجعية العربية أو الدكتاتوريات العتية التي قد تسعى " انتصارا لصديقها القديم" او بسبب خوفها مما حصل في تونس الى تشويهه وتحويل مساره، والعنف هو سبيلها الوحيد الى ذلك... ببث الهلع او بالاغتيالات السياسية مثلا ...
ـ الامبرياليات التي قد لا تطمئن الى ان القوى المعتدلة ستحسم الامر لصالحها و عليه فان خوفها من انحراف المسار لصالح " المتطرفين" سيجعلها متحفزة و لكن تدخلها سيكون دبلوماسيا
اما داخليا فان فان محاولات الالتفاف على ما أنجز سكتكون آنية و و لاحقة... في سياق الصراع على موضع ضمن حكومة انتقالية... او لاحقا اتناء الانتخابات التشريعية و الرئاسية...فلئن تمكنا من كشف النخب الاسياسية الانتهازية بيسر بما يساعد في عزلها فقد يكون عسيرا كشف محاولات الالتفاف في ضوء تحالفات و تغير المشهد السياسي لاحقا.
ان هذه الاخطا قد تكون حقيقية و قد تكون مجرد هواجس نظرا لحالة التوتر الشديد الذي ينتاب الجميع ... و في خضم الطفرة الشديدة للأخبار و الواقف و التحليلات المتضاربة.و اليوم و لأن الامور مرشحة للهدوء أكثر من الايام السابقة فان احتمال ان تكون مجرد هواجس يصبح الاحتمال الاقرب.
ان الهدوء النسبي يجب ان يستغل اولا في اعادة دورة الحياة الى طبيعتها... اعادة دورة الاقتصاد الى العمل بانتظار ان يكون نسقها اسرع في ضوء الاصلاحات التي ستقرر لاحقا و حتما تفعيل عمل اللجان المكلفة بالاصلاح السياسي و محاسبة الفاسدين... ثم على جميع الحساسيات السياسية بعد ذلك ان تبدأ بمراجعة خطوطها ... ليس على التجمع وحده ان يقطع مع ماضيه... بل على كل الاحزاب والحساسيات ان تراجع على الاقل تصوراتها و طرائق عملها و توضح بدائلها و برامجها... بل على بقية مكونات المجتمع المدني ان من جمعيات و غيرها أن تنخرط هي الاخرى في نفس المسار.
اعتقد ان الابدال وثيق الصلة بالوعي.. لكي لا نخدع مرة اخرى... علينا ان ننخرط جميعا في العمل باعتبارنا أفرادا لا أعضاء في قبائل... بقطع النظر على التنويعات المقترحة للقبيلة... فقد تكون القبيلة حزبا سياسيا او جمعية رياضية
و الوعي بهذه الصلة سيتيح لنا استثمار الحريات الفردية بشكل مدني و حضاري بعيد عن الاغراق في الشعبوية... ثمة قوانين يجب ان تحترم... ليس من حقنا ان نعزل و نسمي باسم الشعب او ان نقتل باسم الشعب
القطع مع ما تكرس يعني اننا سننجح في انتاج خطاب سياسي و ثقافي جديد لا أن نعيد انتاج الخطاب القديم...
أخشى ان نعيد انتاج نفس الخطاب القديم ، خطاب " الخاضعين للديكتاتورية "بخطاب مغلف بلبوس شعبوي...


رجاء الى كل تونسي

رجاء الى كل تونسي... رجاء بنبرة توسل... الوضع كما يبدو لا يتحمل الاخبار الكاذبة و لا المزايدات و لا التصعيد المجاني و لا الرومانسة المفرطة...
اولا:
اللي عنده خبر موش متأكد منه من غير ما ينشره... موش لازم .. وخاصة الاخبار متع الانفلات الامني ...فلنتجنب قدر الامكان بث حالة الهلع بين بعضنا من غير ما نقصدوا..و في نفس الوقت يلزمنا ننقلوا الاخبار الموثوق من صحتها .. المعلومة يلزمها توصل راهو الامر مهم جدا
ثانيا:
المزايدات موش وقتها... موش وقت صراع بين الالوان السياسية راهو مراجعة الامور الكل ممكن بعد حين... ينجم يتأجل نهارين و الا ثلاثة..و الا شهر
يلزم وقت باش نفهموا البرامج الكل و تتناقش... و موش معقول بباش تبدأ المزايدات من النهار الاول... راهي المزايدات الفارغة تحل باب الخراب... وراهو الابدال اللي صار انجزوه التوانسة الكل... من غير مزايدات... من غير استعراض بطولات... من غير زعاماتية .. من غير امراض يسراوية.. من غير خطاب وجداني يستدر العواطف بالدين و الا بتعديد التضحيات... من غير شعبوية... بجاه ربكم موش وقت رد فعل راهو وقت فعل... راهي فرصة ما يلزمش تهدر... عندنا اكثر من خمسين عام في الظلام... كيف خرجنا للضوء اعطوا للعين فرصة انها تعدل فتحة الحدقية... اعطوا للعين فرصة انها تتعود على الضوء...
ثالثا
موش وقت رومانسية... موش وقت تعنيق و بوس... ومواطنين تبوس في الجيش و جيش يبوس في الشرطة و شرطة تبوس في الشعب..
الافضل اننا كل واحد يلتزم يشد بقعته... في اعتقادي موش لازم المواطنين يخدموا لا خدمة الجيش و لا خدمة الشرطة... هم مطالين باحترام حضر التجول بصرامة فقط لا غير... و خلي الجيش يقوم بمهمته... خروج الناس للشارع باش يحموا الممتلكات راهو خرق للحضر... الجيش ينجم يفرز وقتها بين اللي يحمي و اللي ينهب زعمة؟؟.. نتصور لوكان الجيش يسير دورياته و هو متأكد اللي المواطنين محترمين الحضر أحسن للناس الكل... باش وقتها كيف يموت سارق ما نقولوش مات مناضل...

اقتراح بخصوص الـ 404


الاقتراح بسيط وواضح و ممكن النتفيذ.: أنا نقترح على جماعة الحجب و الرقابة ( متع الـ 404) باش يبدلوا 404 بـ 707 اقتداء بجماعة التلفزة تونس 7 و جماعة التاليفون ( المفتاح كان صفر (0) توة كيف ما يعرفوا التوانسة الكل ولى (7)) و جماعة الطيران متع ( 7air)... هذا الى جانب جل رياض الاطفال والمدارس الابتدائية والمعاهد و الكليات و مبيتات الطالبان و الساحات العامة و الفضاءات الرياضية و الترفيهية ... هاو كيفاش تطلع الصفحة لوكان تعملوا بالنصيحة

بلوغستان و الحجب


وقت اللي قررت ماعادش نكتب ـ عشرة أشهر لتالي تقريبا (بالرغم اني ما نكتب في شيء ) كانت وهاد بلوغستان ترزح تحت طغيان المقاتلين الطالبان الافتراضيين، اللي يحاربوا باسم العقيدة. جات فترة كان يكفي انك تحل صفحة المدوناتباش تلقى اللي يخليك تشوف (في خياله طبعا) المقاتلين البلوغستان بلبستهم المميزة، راكبين على الموبيلاتات كيف اللي يركب عليهم الملا عمر و على ظهورهم كلاشينكوف و متحزمين بالاحزمة الناسفة و يشقوا في الوهاد و السهول... متع بلوغستان، و ساعة ساعة تشوف زهمولة كحلة في وسطهم وهذيكة ما تكون كان امراة مجاهدة تحارب في الكفار و الملاحدة.. في هاك الفترة ظهروا برشة تميزوا بركاكة الاسلوب والقدرة العظيمة على السبان و استعمال المعاجم متع النتانة و القذارة بأنواعها...
ها الفترة هذي اثرت سلبا في برشة مدونين... ثمة اشكون استمر و ثم اشكون انسحب و حجب روحه بروحه و الا سكر محله...
واللي عملوه طالبان البلوغستان يعملوا فيه جماعة الرقابة توة في ها الفترة هذي... أما كل واحد بطريقته... بحيث كل يوم تتحجب مواقع ومدونات جديدة و بنسق سريع و غريب... و" كل يوم في حبك تزيد الممنوعات كيف ما قال الراجل"
انا واحد من الناس اللي تحجت مدوناتهم بالرغم اني كنت حاجبها تلقائيا على خاطر حبست كتيبة عندي اكثر من 10شهر تقريبا... والنص اللي يبدو انه سبب في الحجب نص قديم ، منشور سابقا... بايت يعني...
الحجب ماهوش حدث استثنائي .. ولى امر عادي جدا بالرغم انه موش مشروع و موش قانوني.. و من حسن الحظ ثمة الف وسيلة لتجاوز الحجب بتغيير عنوان المدونة مثلا (انا مثلا بدلت nared2009بـ nared2010 و نجم نبقى نبدلها ميات ألف مرة) او باضافةwww ... ها الوسائل تخلي الحجب عمل عبثي زادة على خاطر ما عنداش حتى قيمة فعلية وموش باش يمنع الناس من الدخول للمواقع اللي يحبوهم ...
يقول القايل اللي قاعدين يحجبوا يعرفوا ها الحقيقة... املا علاش مستمرين في العمل العبثي المجاني...؟؟؟؟
و الجواب بسيط ياسر
على خاطر الحجب يعبر على وجود السلطة و يعلن امتلاكها للمجال او الحقل اللي قاعدة تتصرف فيه كما يحلو لها.....
برشة حيوانات تسطر حدود مجالها الحيوي ببولها او روثها. و بها الطريقة تعلن سيطرتها و امتلاكها كل ما يقع ضمن ذلك الحيز من طرائد و اناث وحشيش و هوش و حجر ....و رائحة البول هي الرسالة التحذيرية اللي يفك شفرتها اي حيوان اخر يوصل لهاك المجال.... و الحجب زادة نوع من ها الممارسات وثيقة الصلة بالحيوانية... اللي قاعد يحجب يعرف انو عمل عبثي ما عنده حتى معنى و انو اي واحد ينجم يدخل للمواقع اللي يحب عليهم اما هو يحجب باش يعلن هيمنته على المجال... بالحجب تعلن السلطة هيمنتها على الانترنيت و احنا اللي نخلصوا في الفلوس ما عندنا حتى حق ...مزية منها كيف نتعدوا و نجموا ندخلوا لجريدة "الحرية "والا "الحدث" مثلا.... كيف ما تعمل اي هايشة مزية على الهوايش الاخرين كيف يشقوا مجالها باش يتعدوا يشربوا من النهر من غير ما تاكلهم...
باختصار الانظمة الديكتاتورية اللي تمارس كل شيء باش تخبي غطرستها و تسكت كل الاصوات و الا الفكر الاصولي اللي يرفض الاخر جملة و تفصيلا الزوز يعطلوا و يعرقلوا قيام دولة حديثة فيها مواطنيين موش رعايا أما مستحيل يمنعوا قيامها في لحظة تاريخية وبعد حصيلة مراكمات معينة ... بوادر الامل موجودة والحملة اللي قاعدة صايرة ضد الحجب... بطابهعا العفوي (بعض اشكال الانخراط في ها الحملة تبدوا عفوية اكثر من اللازم) وحدة من بوادر الامل..




الحجب: مأزق الديمقراطيات الكرتونية

(مقال قديم نعاود ننشره في سياق الحملة ضد الحجب اما ميسالش عدوهالي المرة هذي...) اكيد تتفكروا وقت اللي كنا صغاران الواحد نحوله برشة حاجات من بين ايديه بتعلة انها "كخة" و فيها الدود... ساعات تبدا تاكل في حاجة و تتبنن ( كسكروت بالتاي مثلا ) و فجأة يطب عليك واحد من الكبار ( الجيعانين) يهزهالك من ايديك و باش ما تبكيش وتبردلها عليه يقلك: تي باش نحيلك منها الدودة... فيها كخة راهو"
طبعا انت تعرف و هو يعرف و العالم الكل يعرف انه لا ثمة لا دودة و لا كخة و لا هم يحزنون، كل ما في الامر ان السيد هذكا هزلك حقك بدون وجه حق و من فوق استغباك و استغفلك و هذا المؤلم... وحديثنا قياس:

يعني الحجب، بشكل فج و صريح ان السلطة السياسية قررت ان المواطن غير مؤهل لاتخاذ قرار بسيط ياسر و هو: من أين سيحصل على المعلومة؟هذكا علاش هي قررت(على خاطر ها المواطن قاصر في نظرها و غير مؤهل لاتخاذ قرار بسيط من ها النوع)باش تختار له المواقع و المدونات اللي يدخلها و المواقع اللي ما يلزمش يدخللها على خاطرها كخة و فيها الدود و بالطريقة هذي تكون حطت روحها قدام تناقض صارخ و مأزق حقيقي على خاطر المواطن اللي افترضت انه قاصر و ما ينجمش ياخذ القرار الصحيح وقت اللي يختار مصدر المعلومة هو نفس المواطن الذي تستمد منه مشروعيتها كيف تقول على روحها انها أنظمة ديمقراطية جدا جدا و منتخبة بنسبة 99.99 بالمائة، هو نفس المواطن اللي ينتخب( و الانتخاب هو قرار متعلق بمسألة سياسية مهمة و خطيرة) ولكن كيفاش يكون المواطن أهل باش يقرر اشكون باش يترأس الجمهورية و اشكون باش ينوبوه في مجلس النواب، يعني يختار اللي باش يدير شؤون الوطن، اشكون يحكم و اشكون يبقى يتفرج اذا كان موش قادر على اتخاذ قرار بسيط كيف يقعد قدام الكمبيوتر؟
هنا يولي ثمة برشة احتمالات و برشة اسئلة:
اما ان المواطن اللي يصوت نهار الانتخابات هو غير المواطن اللي تتحجب عليه المعلومة و في الحالة هذي نسأل: من أين جبتوهم اللي انتخبوا؟و كيفاش تعدوا و ما شفناهمش و ما فقناش بيهم، زعمة يطلعوش موتى و الا مريخيين؟؟؟؟
و اما انه نفس المواطن و في الحالة هذي نستنوا لين توفى المسرحية و انشاء الله ما يطيحش الديكور فوق روسنا على خاطر قديم برشة...سنين و منين و الناس الكل تمثل.
الاحتمال الثالث و هو انه حكاية الحجب حكاية فارغة و ما ثماش منها (و هاو الدليل هنا و هنا و هذا راهو ما اسماش حجب)

ها المأزق تم تجاوزه في البلدان الديمقراطية ، رغم ان ها البلدان تعمل في ضريبات رقابة ساعة ساعة (أما من غير تطييح قدر و من غير بهامة) .يقول امبرتو ايكو في احد حواراته حول المكتوب و المرئي، متحدثا عن الكم الهائل من المعلومات التي خلقها وجود الحاسوب:"
نحن نواجه خطر الكثرة وانتصار المكتوب يساهم في ذلك. إنها مأساة. فالإفراط في المعلومات يعادل الضجيج. وقد فهمت السلطة السياسية في بلداننا ذلك جيدا. فلم تعد الرقابة تمارس عبر الاحتجاز أو الإقصاء، وإنما عبر الإفراط، إذ يكفي اليوم لتدمير خبر إرسال خبر آخر خلفه تماما. وأحسن مثال عن ذلك هو ما حدث خلال حرب الخليج. "( الحوار كاملا هنا)
كلام امبرتو ايكو ( اللي ظاهر قاله و هو يفكر في برلسكوني/امبراطور الاعلام/السياسي الطلياني المشهور)، كلام امبرتو ايكو يبين الفرق مابين الانظمة الي تحترم شعوبها و الانظمة اللي شعارها " اشرب و الا طير قرنك وكان عجبك و غيرها"
و نرمااااااااااااااااااااااااااااااااااااااااااااااااااااااااااااااااااااااااا
اااااااااااااااااااااااااااااااااااااااااااال