الكبير... (كبر الهم يضحك)

أنا يظهرلي ثمّة مشكلة في فهمنا للعالم، وهي في نفس الوقت أمارة على انّنا بعدنا برشة على الخزمة ( متع الحضارة).

ها المشكلة تتمثّل في التعلّق المبالغ فيه بالحاجات الكبيرة والطويلة و هو في الحقيقة مشكل يصيب الحكام أكثر من الشّعوب (بالله ما تبدوش تفكروا في حاجات خايبة..)

كان تتفكروا الحكاية متع المدفع العملاق اللي حب يعمله صدام حسين و اللّي يقولوا انّ المخابرات الاسرائيلية اغتالت العالم الكندي اللي كان يشرف عليه... فكرة مدفع عملاق طول ماسورته 156 متر ويوصل وزنه تقريبا الى حدود 2500طن تظهرلي فكرة غريبة ومهووسة (هنا) و في الحالات الكل، نتصور أنّ تطوير القدرة الحربية كان متاح بطرق اخرى أضمن و أنجح ... المهمّ ، المشروع في النهاية فشل بعد طبعا ما تسبب للعراقيين في خسارة الله أعلم بيها قداش.

و موش معقول باش نتفكروا المدفع العملاق و ننسوا النهر الصناعي العظيم، ها المشروع اللي تعمل رغم اللي الدراسات وقتها أتثبت اللي الموارد المائية في ليبيا محدودة وينبغي التعامل معها بحذر. المشروع تعمل بخمسة ملايين طن اسمنت و الاسلاك المستعملة في تصنيع الانابيب تتلفّ على الكرة الارضية 280 مرة...(هنا)

كيف عملو الحسابات التقديرية متع المشروع طلع يكلّفهم تقريبا سبعة وعشرين بليون دولار. و الله أعلم قداش تصرف منهم وتشققت الانابيب و قريب يشيح الماء و فشل المشروع (بحسب الموقع هذا )

و لوكان نمشوا لشيرة الخليج تو نلقوا أعلى برج في العالم، برج دبي و ارتفاعه 160طابق) و برج اخر قاعد يتبنى بحذاه وباش يكون أعلى منه ( برج جدة 1600 متر) و ربما ينبت برج أعلى منهم الزوز...

و ثمّة حاجة أهم، و هنا تولي المنافسة على أشدها، بحيث انّ كلّ واحد من الجماعة يحب يطيح على الي قبله، وأكيد انكم عرفتوا اني نحكي على أطول مدّة حكم.

زعمة اشكون من الحكام العرب اللي باش يحطّم الرقم القياسي ؟ (من سيدرك التسعين؟)

وها الغرام الغريب ما يمسّش الحكاّم اكهو، لا ، المسؤولين المحليين و بالاشتراك مع الشعوب الكريمة عندهم ضريبات . وهنا نولّوا نحكوا على أكبر كسكسي ( أغادير/المغرب) وأكبر كبسة (السعودية ) وأكبر خبزة مطبڤة وأكبر بركوكش(قفصة/تونس ) ...

وبما أن ّ الواحد صرف صرف نزيد نفكركم في بعض "مبدعينا" اللي يتنافسوا على كم الاوراق اللي كتبوها (يكتبو في الجرائد والمجلات و يطبعوا في الكتب و تلقاهم في التلفزة و في الرديون و في الجامعة و في الجامع وفي التجمّع و في في سبيطارو في محطّة الكار .... و همّهم الاساسي: اشكون يكتب أكثر وما يقول شيء؟؟؟؟؟ (في حين انّ رامبو ، مثلا ،الشاعر الفرنساوي اللي غير نظرة العالم للشعر عنده ديوان واحد و ديوان صغير زادة)

و تكبروا وتنسوا... و كبر الهم يضحك.