هات نتخيلوا الثورة ثنية... ثنية طويلة وواعرة.. حفر و حجر و شوك ... صعدة و هبطة...
ثنية تهز من حال لحال موش من مكان لمكان... و هات نتخيلوا الناس اللي ماشين على الثنية هذي...
اكيد انهم ما بدوش الرحلة في نفس الوقت.. ثمة شكون سبق و ثمة اشكون خلط خلوط.. ثمة شكون مشى خطوتين كأنه يشيع في جنازة و من بعد حبس... و ثمة شكون يمشي خطوة لقدام و خطوة لتالي ( مكانك سر)... اكيد ان ان الناس اللي ماشين على ها الثنية ما عندهمش نفس النفس.. نفس العزيمة و القوة... ثمة اللي يمشي خطوة و يوقف.. يخزر وراءه و يثبت اش ثمة القدام... و ثمة اللي يعفس و ديما على قدام حتى كان يطيح في هفهوف (الى الامام ... ثورة ثورة ثورة.. كيف ما قال القدافي).. ثمة اللي تمشي مع حبيبها و ثمة اللي يمشي وحده... ثمة اللي يغني ... اللي ...ساكت... اللي يمشي في قلب الثنية مع جماعته... ثمة اللي يمشي على الجنب
بعد عام.. الاكيد انه موش الناس الكل مازالت تمشي.. ثمة اللي وقف.. و اللي وقف ماذابيه لوكان الناس الكل توقف وين وقف هو... ماذابيه ماعاد يقدم حتى حد خطوة لقدام..يمكن وقف على خاطر لقى حجرة يقعد عليها وهو من الاول كان يلوج على حجرة يقعد عليها... و كيف لقاها ماعادش باش يحركه حتى شيء من هاك البقعة.. اكيد ثمة عباد تموت على القعاد على الحجر.. تعبد الحجر.. الاكيد انه اي واحد يوقف باش يحاول يوقف الاخرين... ينجم يقلهم مثلا : ثمة غول لو كان تكملوا تمشوا القدام ياكلكم... ينجم يتهمهم انهم باش يتسببوا في كارثة .. و انهم يحبوا يقتلوا العباد بالجوع و يهزوهم للهاوية... و اذا الحيل هذي الكل ما نفعتش.. الاكيد انه باش يقول اللي ربي بيده هو اللي قال اللي يلزمهم ياقفوا...(طبعا كل واحد منا ينجم يتخيل اللي قعد على الحجرة كيف ما يحب هو ينجم يتخيله لابس برنوس و الا عامل لحية.. مسألة خيال و كل واحد وجهده)
بعد عام الاكيد ان صارت برشة حاجات في الثنية.. تضحك .. تبكي... برشة حكايات و برشة عرك.. اللي عفسوله على الشلاكة اللي لابسها ..و رصتله يكمل حفيان و اللي واقف يبول تحت شجرة.. اللي ضايع فيها و اللي لاعبها بطل و خرج من الثنية جملة ... و اللي يحب الناس تمشي شادة الصف و اللي يحبهم يمشوا مقسمين النساء و الرجال... اللي يخطب علي الناس... و اللي يبعبص و يهرب... اللي يسرق و اللي ..يعطي في الكسكروتات و الماء... اللي ينزف و بكله جروح... ـ
ثنية طويلة... واعرة اما يلزمنا نكملوها
اللي يتصور اللي الثورة هي تغيير السلطة الاكيد انه وقف و ماعادش ينجم يكمل معنا حتى خطوة لقدام... و اللي يعرف مليح اللي الثورة هي تغيير مجتمع.. تغيير عقلية الاكيد انه مازالت الثنية قدامه طويلة... اكيد ثمة اشكون باش يتعب.. اكيد ثمة شكون باش يفد و ينهار.. و لكن الاكيد انه ثمة اشكون باش يكمل الثنية للاخر
*الصورة: انتفاضة الحوض المنجمي 2008
اللي يتصور اللي الثورة هي تغيير السلطة الاكيد انه وقف و ماعادش ينجم يكمل معنا حتى خطوة لقدام
ردحذفاللي يعرف مليح اللي الثورة هي تغيير مجتمع.. تغيير عقلية الاكيد انه مازالت الثنية قدامه طويلة
و لكن الاكيد انه ثمة اشكون باش يكمل الثنية للاخر
جميل جدا. هذا ما يجب أن يقال.
incroyable
ردحذف